main khayal hoon kisi aur ka mujhe sochta koi aur hai
sar-e-aaina mera aks hai pas-e-aaina koi aur hai

main kisi ke dast-e-talab mein hoon to kisi ke harf-e-dua mein hoon
main naseeb hoon kisi aur ka mujhe maangata koi aur hai

ajab e'tibaar o be-e'tibaari ke darmiyaan hai zindagi
main qareeb hoon kisi aur ke mujhe jaanta koi aur hai

meri raushni tire khadd-o-khaal se mukhtalif to nahin magar
tu qareeb aa tujhe dekh luun tu wahi hai ya koi aur hai

tujhe dushmanon ki khabar na thi mujhe doston ka pata nahin
tiri dastaan koi aur thi mera waqia koi aur hai

wahi munsifon ki rivaayatein wahi faislon ki ibaaratien
mera jurm to koi aur tha p meri saza koi aur hai

kabhi laut aayein to poochna nahin dekhna unhen ghaur se
jinhen raaste mein khabar hui ki ye raasta koi aur hai